Sunday, June 22, 2008

(:عزيزى المواطن .. قوم اقف

الصورة من موقع مصراوى

من فترة مش بعيدة .. حوالى كام شهر .. كان فى اعلانات بلون اخضر لحملة اسمها "مدرستى" .. و انا من كتر الاعلانات قلت كانوا وفروا فلوسها و بنوا بيها مدرسة جديدة .. الاعلانات كانت تحسسك بالرقى كده و انك مواطن ليه احترامه .. كان فيها كلام جميل زى "انا نفسى مدرستى يكون فيها اوضه موسيقى" .. و "انا نفسى مدرستى يكون فيها ملعب" .. و" انا نفسى مدرستى يكون فيها حمام سباحة" .. و انا عمرى ما سمعت تعليق من حد انهم انجزوا الحاجات دى .. انا كل اللى فاكره بوسترات غطت طريقى كل يوم و انا رايح الكليه او راجع
و بالصدفه بدور فى جوجل عرفت ان فودافون اخدت جايزة عن الحملة دى .. يعنى اللى مول الحملة شركات استثمار .. قلت مش مشكلة .. بس بردو اللى معرفتوش .. هى الحملة دى بنت كام مدرسة ولا رممت كام مدرسة و وصل للعدد فى البوسترات ولا لأ؟
بس دى سياسه متبعه .. انا عمرى ما سمعت عن انجاز عملناه .. دايماً بسمع ان المستقبل مشرق .. و هنعمل .. رغم انهم لو قالوا بنينا 100 مدرسه .. ده هيخلى فى ثقه متبادله .." لكن تحس اننا مجرد بصمجية .. هنبنى .. طيب .. بنيتوا ؟ لا لسه .. طيب " و هكذا
و بعد حملة مدرستهم .. ظهرت دلوقتى حملة جديدة .. بعنوان "وقفة مصرية" .. بوسترات باللون الاحمر طول شارع جسر السويس و مكمل معاك من العباسية لرمسيس للدقى للجامعة مرورا بكل شوراع القاهرة تقريباً .. الحملة فيها بوسترات بعناوين انه "نحكم عقلنا .. نشبع كلنا" مع صورة رغيف عيش من ابو ربع جنيه .. او "نحكم عقلنا .. نشرب كلنا" .. او "نحكم عقلنا .. نشتغل كلنا" .. و فى الاخير مفادها انه "قبل ما نجيب مولود .. نتاكد ان حقه علينا موجود" .. و انا مش ضد الحملة .. بس عايز اعرف فايدتها ايه فى الوقت الراهن .. ذنبى ايه ان الرئيس هيعمل مؤتمر سكان .. انا اتفقع ليه؟! .. هو فى حد بيتجوز لما يخلفوا ؟ .. بعدين ما الحملات دى فشلت من زمان .. انا قريت عن حملة اسمها "انظر حولك" .. و معرفش ليها علاقه بانظر حولك و ابتسم ولا لا :) .. و انظر حولك دى كانت فى الثمانينات لما كنا 40 مليون نسمة .. دلوقتى لما بقينا 80 مليون .. ناويين نقف ؟ .. ده احنا المفروض ننام و نستغطى :) ..
احنا مش ضد الحمله .. بس بلاش الاستفزاز ده .. عايزين حمله اعملوا حاجه ليها قيمة .. لكن بوستر باستفزاز رغيف العيش ولا كوباية الميا اللى شكلها غريب على المواطنين فى وقت اصلا بيتعمل قانون احتكار "مش منع احتكار" و قانون طوارىء بيتمدد كان المفروض تبقى .. نحكم عقلنا .. هنتخنق كلنا

2 comments:

Unknown said...

!و لما نحكم مبارك يحصل أيه؟
:D

a.aTeYa said...

يحصل اللى يحصل بقى انت هتعترض على قدرك ؟

:D

النهارده كنت فى معهد الاورام و قارنت الصورة اللى ادامى "لايف" بالصورة اللى على بوستر _اه بوستر_ " نحكم عقلنا نتعالج كلنا" .. حسيت ان شر البليه ما يضحك

:D